عسى بفستانها أشواك وفي ثوبه عقارب سود...

[كلي أمل]

ثلاث سنين وأنا أخطط لهذا اليوم يابو سعود..

تيسر حالي وجاهز أوفي وعدي بوقته...

وفجأة جتني تتعذر تقول تأخرت الوعود...

وأنا مستغرب وأسمع كأني بوعدها خنته...

حسبت إنها تمازحني وتتصنع جفا وصدود...

ضحكت بوجهها من قلب مع إنها بايخه النكته...

وقالت إرضى بالواقع قلبي ماهو المعهود...

تغير كل شي صوبك نصيبي ما أظن أنتا...

كنت بيوم محبوبي ولكن ما أظن نعود...

وصل من قبل ما توصل وأنا ذاك الصبر عفته...

ولكن تكفى صدقني ويشهد ربي العبود...

ترى ماخنتك بغفله ولاكلمته وشفته...

صراحه أهلي قالوا لي بإنه ولد أصل وجود...

جتني أمه بالصورة وبكلمات المدح أخته...

سكت وقلت ذي فرصه مادام الجود في الموجود...

وقالوا كل من حولي علامات الرضا سكته...

وأنا فكرت مادام أمه وأخته ماعليهم زود...

أكيد إني براضيهم إذا وافقت وإخترته...

وأراضي أهلي واخواني مادام إن الفرح مقصود...

عطيت الناس أنا كلمه ومعاهم وقتي حددته...

ولا أقدر أغيرها ترى عند العرب منقود...

أوافق وأعتذر باكر وأقول الراي غيرته...

تبي تشرح لي المنقود تصدق يابو سعود...

تبيني أقتنع وأرضى بحال عمري ما عشته...

أنا ماني بقايل لها عسى يفرش ثراها ورود...

بعد ماحطمت قلبي وطعم الموت جربته...




يتبع...

[كلي أمل]

عسى بفستانها أشواك وفي ثوبه عقارب سود...

ونار تحرق الكوشه وتحرق بيتهم حتى...

وموت بليلة الدخلة يبرد حرتي ياكود...

ولا أحس إنها بحضنه يلامس خد لامسته...

علي أهون إذا ماتوا ولا بنفس السرير رقود...

ترى صعب علي أتخيل اللي ما تخيلته...

عسى قاع الثرى يقسى ويتحول صخر جلمود...

وحفار القبر يرفض يسوي فوق مقدرته...

ترى دفنت عديم الذات تلوع حتى كبد الدود...

ومن خان العهود ومات تعافه حتى مقبرته...

عسى ربي يجازيهم بحبل من مسد ممدود...

يعلقهم من أطرافه وفوقهم نار ومن تحته...

أنا ماني حقود ولاني من نسل نمرود...

ومن حط نفسه بوضعي بيقول اللي أنا قلته...

مادام الفعل له ردة فعل وإلا أبشري بردود...

أبدعي دامني حي وأبغرس للدعاء نبته...

وأبسقيها نزيف القلب ودمع مارحم الخدود...

وتكبر والثمر ثاري من اللي خانني وصنته...

نذر علي أكتب وأفجر هالقصيد رعود...

وأسمع كل بشر صوتي عجبته وإلا زعلته...

وأردد للي يسمعني إذا حبيت حط حدود...

أنا حبيت دون حدود وشوف اللي تكبدته...

ثلاث سنين أنا أبني وجت صورة بكل برود...

خذت مني شقا عمري وحلم قلت حققته...

ثلاث سنين أنا أخطط لهذا اليوم يابو سعود...

توافق في كلام أخته وصورة أربعه في سته...



عذراٌ على الإطاله...وأتمنى أن تنال على إعجابكم...


with my love

[كيفي سعودي]

كلي أمل

قصيدة حزينه حزينه حزينه

قراءتها اكثر من خمس مرات من أعجابي
بمثل هذي القصايد

تسلمين يالغلا على الابداع
وربي يعطيك العافيه

[دلع الدواسر]

رووووووووووعه


من جد قصيدهـ تموت قهههههههر

يعطيك العافيه اختي

ويسلمووو اناملك على نقلك الرائع

تحياتي....

[كلي أمل]

هلا فيكم أخواني


شاكرة لكم مروركم


الأكثر من رائع...

[الوحيده]

قصيده روووعـــهـ ..,

جد تقهــر ..

مشكوووره يالغاليه ..,

[الكايد]

كنت بيوم محبوبي ولكن ما أظن نعود...

وصل من قبل ما توصل وأنا ذاك الصبر عفته...


يكفيني هذاا البيت يا كلي أمل من جد روعه شي


ماكنت أتخيله يعني ألى الحين والعالم مو بخير


لكن من جد قلبي محروووووق على من قال


هذاي الأبيات لكن الله يعطيها الصبر ويعوضها


ربي بأحسن من ابو سعود ويسعدني أن أكون أحد


الموقعين في صفحتك ....

[كلي أمل]

قصيده روووعـــهـ ..,

جد تقهــر ..

مشكوووره يالغاليه ..,



هلا فيك أختي


أسعدني مرورك


آسفين على القهر ...


ومشكورة على المرور الرائع

[كلي أمل]

كنت بيوم محبوبي ولكن ما أظن نعود...

وصل من قبل ما توصل وأنا ذاك الصبر عفته...


يكفيني هذاا البيت يا كلي أمل من جد روعه شي


ماكنت أتخيله يعني ألى الحين والعالم مو بخير


لكن من جد قلبي محروووووق على من قال


هذاي الأبيات لكن الله يعطيها الصبر ويعوضها


ربي بأحسن من ابو سعود ويسعدني أن أكون أحد


الموقعين في صفحتك ....


هلا فيك كــــــــايـدهـم


مو العالم كله ماهو بخير


راح تتعب وأنت تدور لكن في النهاية صدقني



راح تلاقي ناس ما كنت تتوقع وجودهم في هالزمان...



يشرفني ويسعدني مروروكـ ...


شاكرة لك مرورك المتميز ...


وتقبل تحياتي ...

[عاشق سراب]

الراقيه

كلي امل


يعطيك الف عافيه ولاهنتي يالغلا


بس ودي القصائد المنقوله تكون بقسم المنقول فديتك

تقبلي كل الود

[كلي أمل]

هلا فيك مشرفنا الغالي ...

أبشر .. وان شاء الله القصائد المنقوله

ما تنزل الا بالقصائد المنقوله ...

ومشكور على المرور ...